Á döfinni

Niðurstöður aðalfundar 2020

Niðurstöður aðalfundar 2020

Aðalfundur Hagsmunasamtaka heimilanna 2020 var haldinn 25. febrúar síðastliðinn. Á fundinum var kosin ný stjórn sem hefur nú skipt með sér verkum og er skipuð þannig:

  • Ásthildur Lóa Þórsdóttir formaður
  • Vilhjálmur Bjarnason varaformaður
  • Sigríður Örlygsdóttir gjaldkeri
  • Hólmsteinn Brekkan ritari
  • Einar Valur Ingimundarson meðstjórnandi
  • Hafþór Ólafsson meðstjórnandi
  • Róbert Þ. Bender meðstjórnandi
  • Varamenn: Þórarinn Einarsson, Ragnar Unnarsson, Björn Kristján Arnarson, Stefán Stefánsson.

    Þau hafa öll starfað áður í stjórn samtakanna.

    Aðalfundurinn samþykkti að félagsgjöld 2020 verði óbreytt 4.900 kr. og valkvæð sem fyrr.

    Þá voru skoðunarmenn reikninga samtakanna, Sigfríð Gerður Hallgrímsdóttir og Sólveig Sigurgeirsdóttir, endurkjörnar.

    Á fundinum var samþykkt breytingartillaga á samþykktum samtakanna sem stjórn var falið að útfæra nánar en hún er eftirfarandi:

    • Núverandi [fyrrverandi] 2. mgr. 9. gr. svohljóðandi: Stjórnarstörf eru ólaunuð, svo og þau verkefni sem stjórnarmenn taka að sér fyrir samtökin. Þó er heimilt að greiða fyrir útlagðan kostnað sem til fellur vegna rekstrar samtakanna.
    • Orðist svo: Stjórnarstörf eru ólaunuð, en heimilt er að greiða fyrir útlagðan kostnað vegna rekstrar samtakanna. Þrátt fyrir það getur stjórnarmaður til jafns við aðra gefið kost á sér til verkefna, sem stjórn ákveður að stofna til og kaupa þjónustu fyrir gegn eðlilegu og sanngjörnu endurgjaldi, enda hafi atkvæði hans ekki ráðið úrslitum um þá ákvörðun. Skal hann þá jafnframt víkja sæti við allar frekari ákvarðanir stjórnar um verkefnið. Gera skal skriflegan þjónustusamning um hvert verkefni, sem innihaldi skýra verklýsingu og upplýsingar um alla kostnaðarskiptingu verkefnisins milli verkkaupa og verksala.

    Loks samþykkti aðalfundurinn eftirfarandi ályktun:

    Aðalfundur Hagsmunasamtaka heimilanna lýsir því yfir að ekki komi til greina að selja bankana, hvorki að hluta né öllu leyti, fyrr en Alþingi hafi séð til þess að farið verði ofan í saumana á þeirri meðferð sem heimilin máttu þola í kjölfar bankahrunsins af hálfu fjármálafyrirtækja og stjórnvalda, með því að láta gera Rannsóknarskýrslu heimilanna.

    Ofsóknir hafa átt sér stað á Íslandi frá hruni. Varlega áætlað hafa 15.000 fjölskyldur verið hraktar frá heimilum sínum í krafti aflsmuna og án nokkurra varna. Það eina sem þetta fólk gerði af sér var að treysta ráðgjöfum bankanna og taka húsnæðislán. Þau fengu aldrei að verja sig en hafa verið dæmd til harðrar refsingar án þess að sekt þeirra væri sönnuð. Þau eiga rétt á áheyrn og uppreist æru!

    Við segjum hingað og ekki lengra! Fundurinn lýsir því yfir að Alþingismenn sem ekki styðji gerð Rannsóknarskýrslu heimilanna eða standi í vegi hennar á einhvern hátt, setji með því sérhagsmuni framar hagsmunum almennings. Ekkert orðspor, enginn flokkur og enginn einstaklingur er þess virði að tugir þúsunda þjáist fyrir. Það er komið nóg!

    Aðalfundur Hagsmunasamtaka heimilanna krefst Rannsóknarskýrslu heimilanna - fyrir heimilin og hagkerfið!


    © Hannað af Filmís 

    Hagsmunasamtök heimilanna voru stofnuð 15. janúar 2009 og eru frjáls og óháð hagsmunasamtök á neytendasviði, til varnar og hagsbóta fyrir heimilin í landinu.

    Orð frá formanni

    CEO 

    Orð frá formanni Varlega áætlað hafa 15.000 fjölskyldur, 45.000 einstaklingar misst heimili sín frá hruni. Enginn hefur svarað fyrir það, hvað þá axlað á því ábyrgð. 

    Þegar 15% þjóðarinnar missa heimili sín, gætir áhrifanna víða. Við sjáum þau í ástandinu á leigumarkaði og við sjáum þau líka í auknum kvíða meðal ungmenna og kulnun hjá þeim sem eldri eru.

    Þegar fólk er svipt heimilum sínum glatar það öryggi sínu sínu og fótfestu. Þegar við bætist magnvana reiði og örvænting vegna óréttlætisins sem það stendur frammi fyrir ásamt hjálpar- og varnaleysinu sem það upplifir þegar heimilinu er hreinlega stolið af því, er ekki nema von að eitthvað láti undan.

    Spillingin í þjóðfélaginu er djúp og hún á sér margar hliðar. Hún birtist ekki bara í háu húsnæðisverði og skelfilegum leigumarkaði eða háum vöxtum og verðtryggingu, hún birtist ekki bara í því hvernig lífeyrissjóðirnir misfara með fé okkar allra eða í „krónu á móti krónu“ skerðingu, hún birtist ekki bara í lágum launum verkafólks á meðan sjálftökufólk af ýmsum toga skammtar sjálfu sér milljónir, hún birtist ekki bara í spilltum dómstólum sem gæta hagsmuna „hinna sterku“ í dómum sínum eða í því hvernig lög- og stjórnaskrárvarin réttindi hafa verið brotin á neytendum frá hruni með skelfilegum afleiðingum.

    Nei, hún birtist í þessu öllu og meiru til. Spillingin er djúp og teygir anga sína víða. Hana þarf að rífa upp með rótum til að hægt sé að byggja upp nýtt og betra þjóðfélag.

    Fyrsta skrefið væri að að afnema verðtryggingu á lánum heimilanna! Öðruvísi er ekki hægt að skapa eðlilegan húsnæðismarkað eða stöðva sjálftöku fjármálastofnanna á tekjum fólks.

    En til að takast á við ræturnar þarf að fara fram rannsókn á aðgerðum stjórnvalda eftir hrun. Jú það var líka spilling fyrir hrun, en þá urðu ákveðin vatnaskil og það var þá sem meðvituð ákvörðun var tekin um að fórna heimilum landsins fyrir bankana.

    15.000 heimili eiga skilið að fá svör og uppreist æru.

    Við biðjum ykkur um að styðja kröfuna um Rannsóknarskýrslu heimilanna!

    Ásthildur Lóa Þórsdóttir
    Formaður HH

    Fylgstu með á samfélagsmiðlum